من شخصا ً اونون حئکایه لرین چوخ ايسته ييرم... بيليرسيز نييه؟ چونکي اونون حئکایه لري او قدر ماراق چکيجیدي کي… حئکایه نین ان داريخديريجي یئرینده ائله بير ايفاده ايشله دیرکي، موضویا ائله بیر باشقا پرسپکتیوده ن باخیر کی، اوخوجونون يورغونلوغو چيخیر، يوخوسو قاچیر. حمید آرغیش ائله بئله يازمير. اورکدن يازير. آما اورک ده ائله بئله اورک دگیل. اونون اوره یينده کي  دامارلاردان معاصیر دورانیمیزین شیره سی آخیر. دورانین  بوتون آجیلیق و شیرینلیک لری – بو آرادا آمما،  ایکینجینین اوّلکی یه گؤره پایی آزدی مع الاسف! اینانین کی منده بو یازینی، حمیدین یارادیجیلیق استعدادینه گؤره ائله بئله يازمیرام. بیر مدّ تیدی دوشونوردوم اونون حئکایه لری باره ده بیر شئی لر یازیم. سونوندا بو قراره گلدیم اؤزو باره ده یازسام داها یاخشی دی. من حقیقتا ً بو کیشینین یازیسیندا،  نئجه دییه للر،  کؤر کین و نیفرت گؤرمه دیم. اونون حئکایه لرینده اينسانلارا قارشي گیزلي، صاف و تمییز ايلهام منبعي گیزلنیبدی..داها دؤغروسو حمید آرغیش  اوستون اينسان اولدوغونا گؤره،  گوجلو و اوستون يازيري.

حمید گونئی آذربایجانین چاغداش حئکایه ژانرینین پارلاق اولدوزودور. یادیما گلیر بیر زامان علیرضا ذیحق باره ده نظریمی دییه نده دوستلار، دئدیکلریمی اؤ کیشی ینن دوست اولماغیما گؤره حساب ائدیردیلر. آما سونوندا علیرضانین باشاریسین گؤره نده سوزومه ایناندیلار. ایندی ایسه یالان اولماسین حمیدی لاپ معاصیر دونیا سئویه سینده یازیچیلارلا برابر گؤروره م. اونون یازیلاریندا  ساغلام معنا، منطقی پوزيتيويزم، عینی حالدا  آناليتيک و بیر نوعی پؤئتیک  فلسفه، اینجه شکیلده آذربایجانین تاریخی هرمنوتیکاسینین عکس اولونماسی ، معاصیر ادبی دیلیمیزین مثبت دکانستراکشنی و ديلين دیریلیگی و شعوری اوزرينده دایانماسی، اونو گونئی آذربایجاندا یازیچیلار سیراسیندا یگانه لردن ائدیب دیر.

" ساغلام دوشونجه "  حمیدین یازیلارینین، فيکير قايناغي اؤلوبدور. اؤنون حئکایه لرینده عادي سؤز استفاده سي نين گرکلی گنيشله دیيلمه سينه گؤره،  يارانان فکر،  اوخوجو وه رینده ن  سؤزون اصیل معناسینی و دئگیلمه سینین  سببيني تاپماقی ممکون اؤلور. اگر اؤخوجو اونون یازیلارینین ، ترمينولوژي باخیمیندان آچار سؤزلرين تاپیب آنلایا بیلسه،  دئمه لی حمیدین فیکرینین کؤکونه ال تاپا بیلر. اؤندا بير چوخ گیزلی معنالار آیدین آشکارا اؤلا بیلر.

آرغیش حئکایه لرینده گؤستریر کی دنیانین ادبی آخیملاریلا تانیشدیر. یازیلاری رئال بير دونيانين انعکاسیدور. چونکی  او، ياشاديغي گونلرين حئکایه سینی يازير. اؤ سمبوللاردان استفاده ائدیر آمما سمبولیست اولمور. چونکی حمیدین  یازی پروسسی سهلی ممتنع کیمین بیریسیدی. آسان و مرکبدیر. هیچ نه کامل دگيل، هر شئي شرطيدير و بوتون مرکب شرطلر اينانديريجي رئاليست اولای کیمی ساده و بعضاً قصدا ً فیطری تورک دیلینده  اوخوجویا تقديم اولونور کي، همین بو ژانر چاغداش اثرين عمومی لشمسینی  تامين ائدير. منجه آذربایجانین چاغداش اثرلرینده، عادی و غیری روشنفکر اوخوجو آراسيندا آنلاشمامازلیق اولماماليدير.

یازینین آخریندا يئري گلميشکن بير ماراخلي مسئله يه ده توخونماق ايسترديم. بو گون دونيادا ادبی جریانلارینی تام  اولدوغو کيمي گونئی آذربايجاندا اولان ادبی آخیملارا تطبیق ائتمک امکانسیزدیر. چوخ زامان آذربايجانیمیزي ياخشي تانییب بيلن يازارلاریمیزين دونيادان، دونياني ياخشي تانیانلار ايسه آذربايجانیمیزدان خبري اولمور. اوندادی کی بیز  اوغورلی یازیلار یوخ،  هپت یازیلاری اؤخوماقا  مجبورقاليريق. بيز بوتون غربین سؤنکی مد لارین گيينيب، موبایل لارین ايشله ديب، ماشينيني مينديگيميزده ماهيتيميزی کؤکلو شکيلده دگيشمه مه لی، اؤزوموزدن چيخماماليييق. هارايا آتيليب دوشسک ده، ادبياتيميز آخونداوفون، محمدقلیزاده ، رسولزاده ، پیشه وری، صمد، ساعدی نین و نئچه نئچه باشقا یازیچیلارین تملينده قورولاجاق. اونلاري دانماق، یئرسیز قیناماق و تزه ریشه سیز بیر  يولو سئچمک، بیزیم ادبیاتیمیزین اینکشافینا یاردیمجبی اولا بیلمز.  بیز حمید آرغیش کیمی،  ياخشيني منيمسه ييب پيسدن امتناع ائتمک يولو ايله رئاللاشا بیلریک. بو، انکشافين قاچيلماز قانونودور. بوردا اعتراف ائتمه ليیيم کي، حمید بورحس دن داها چوخ یئنی لشمیش ساعدیه  بنزه يير. بورادا اؤ قدر خام موضولار وارکی ، یازیچیلاریمیز اونلاردان فایدالانسالار ، یازدیقلاری  روحلارینین، دوشونجه لرینین محصولو اولابیلر، ساده جه بو خام ماتریاللاری  معاصر ارزشلره اويغون استحصال ائتمه ليیيک. باخین ساختا ادبی جریانلار اروپا و غرب دنیاسیندا آذربایجانا هئچ نه وئره بیلمیییب. بیزه ارزشلری اؤز خالقیمیز و ائلیمیز دیکته ائله مه لیدی. باخين، گئچمیش ادبیاتیمیزدان  کیملر سالامات چيخیب … آخي، بيز مغلوبيتلریمیزدن ده درس آلمالیییق.

یئری گلمیش، آلبرت انشتینین بیر سؤزون نقل ائده جگم کی دییه سن حمید باره سینده یازیب" دونندن اؤيرنیر، بو گون اوچون ياشاییر و گله جگه اميد بسله ییر… "