بیزلر چوخ ایشلری اوخوماقلا، ائشیدمک له، تلویزیوندا و یا سینمادا گؤرمه کله آنلایا بیلمیریک. او ایشلری باشا دوشمه گه گرک اؤزوموز ياشاياق. زیندان و اؤلوم مسئله سی اؤ ایشلردن بیری و یا داها دؤغروسو ، ایکیسی دی.

اؤز اؤزومه دئییره م ، من بو یازینی ایگیرمی ایل بوندان قاباق یازمالیدیم. اما نه یازیق کی چوخ ایشلر ال اله وئریب ، یازمامی بوگون صاباحا سالدیلار. البته شوبهه سیز کی بونلاری ایگیرمی ایل بوندان قاباق یازسایدیم، باشقا جور یازاجایدیم. اوندا معنا منیم آنلاییشیما گؤره باشقا جور اولا بیلردی. بیر گون رحمتلیک محمد رضا کسایی- او زامان هه له بیر بندده، همسفره دگیلدیق- اؤن ایکینجی بندین حیطینده منی گؤردو و ناهارا قوناق چاغیردی. ناهار و یا شاما قوناق چاغیرماق، دولت وئرن غذانی قوناق چاغیرانین سفره سینده یئمه کده ن عیبارتیدی. اوردا ئیمک بهانه یدی ، آماج، سونوندا دانیشماق، ایش بیرلیک و هم فیکیرلیک یاپماقیدی. ایسته سم غذانین نئجه یئنی دن دوزتمه سین و ایی قوخوسوندان قورتولماسین یازام، سؤز اوزانار و اصلا ً یازییادا دخلی یوخدی. آنجاق بونو دیگیم کی هر کس ذوقونا گؤره، بیر ایکی دنه کنسرودن زاددان بیر آز یاغ سوغانین ایچینده قیزدیریب سفره یه آرتیریردی. غذادان سونرا آغاینان ( محمد رضایا آغا دییه ردیک) دانیشماقا باشلادیق . چوخ دانیشدیق. البته او دانیشیقلارین سیزه دخلی اولماماسی اوچون، اونلارا ایشاره ائله میره م. تکجه بیر سؤزی دئمک ایستییره م. گئچمیشده ن و گله جکدن دانیشاندان سونرا آغا دئدی: " آدامین روحو ضیدلردن دؤلودو: سئومک و نیفرت؛ دوستلوق و دوشمانلیق؛ دانیشماق و سوسماق و نئچه باشقا ضیدلر. من بو ضیدلرینن یاشییرام و هر بیری بیر یارادیجیلیقین قایناقی اولور. بو ضیدلری الدن وئرسک ، بیزدن بیر شیء قالماز. بیرده بو ضیدلر ایچینده " آغا سوزونه بئله داوام ایله دی " انسان حياتدا بير دفعه ياشاديغينا گؤره، نيي دوز، نيي سهو ائتديگيني هئچ واخت بيله بيلمز. بو، ممکن سوزدور. واريانت يوخدور. مشق شانسي انسانا وئريلمه ييب. سنين هر بير حرکتين، سنين حياتيندير. نتيجه دن آسيلي اولماياراق، سن آرتيق اؤز حرکتلرينله ياشاييرسان. پئشمانچيليق حسّي، " گرک بئله ائديديم " ،- حاقيندا دوشونمک تکجه تسلي وئره ن بير شئي دير. بیرده قالدی کی عومور دخیل کیمی بیریدیر. پول وار قیزیل کیمین همیشه دگرلیدی و پول وار تئز تئز ارزش دن دوشور.اونا گؤره اؤنی ییغمامیزدا عبثدیر. ائله یاشامامیز لازیمدی کی هئچ واقت ارزشدن دوشمویاق" . آغا البته چوخ یاشامادی اما منه گؤره دخیلی قیزیلینان دؤلودو.