|
| گؤي قورشاغي  | عليرضا ذيحق |
گول لری بیچدی و قوجاق – قوجاق آپاریب چایین قیراغینا ییغدی . او نلارین رنگی آل الوان و قیرمیزی اولاراق ، بیر بیرینه قاتیب سویون کناریندا ناخیش لی بیر فرش کیمی سردی . سونرا گئدیب بیر اتک یونجا دريب یاستیق عوضی قویدی باشی آلتینا و اوزاندی گوللر اوزه رینه . اینانیلماز بیر دویغو یاشاییردی و بولبول لرین نغمه سی له تورا دوشَن بالیق لاری دوشونوردی . گونشین ایستی لی یی نی بیردَنیز کیمی گؤره رک اوچان قوشلار بالیق لار کیمی چیرپینماقدا ایدیلار. ناهارا یاخین ایدی و بَتَر آجمیشدی . توری چای دان ائشی یه چکه رک یئددی بالیقین چابا سی اونو سئویندیردی . اونلاردان بیری بالاجا بیر قارابالیق ایدی کی اَل ده خنجر، توری ییرتیب داغیتماق فیکرینده ایدی . باشقا لاری دا بؤیوک اولاراق یوخو گؤزلرین دن داشیردی . او بالیق لاری بیر – بیر دیشاری چیخاریب اوجاق باشینا توللا رکن ، بیردن بیره بالاجا قارا بالیق اؤزونو سویا آتدی و باش یوخاری اوزدی . اونون دا ،ائله بیر آرزوسو وار ایدی . بالیقی گؤزدن ایته نه نه قَدَر ایزله رکن ، جاده ده بیر ماشین دایاندی و ایچین دن ا یکی سیلاحلی آدام چیخاراق بوتون گوللری و یونجالاری دئشه له ییب ایره لی گلدیلر. اونلار هر یئری داغیدیب شراب لا عرَاغ تاپمایینجا ، اونون آغزین اییِله دیلر. سونرا یولا دوشوب گئتدیلر . ایش لری داغ دا باغ دا بوستان دا ، کئفلی توتوب شَهَرده شاللاقلاماق ایدی . بالیق لاری شیشه چکیب اوددا قیزارداراق ، چیخدی آغاجلارا و هر یووایا بیر پای بوراخدی . قوشلاری سئویشمک اوچون ، بسله مک ایستیردی . سونرا یوخو سو گله رک گئتدی سینامایا . هیندی بیر فیلم ایدی کی قیزلارین رقصینی قئیچی له رکن هئچ بیر ماهنی قولاغا چاتمیردی .یوخودان قالخیب گئتدی دوننه . اوزونه هله توک چیخمامیشدی . اینسانلار گولوردو لر و هر قاپ باجادان ماهنی سوزوردی . گؤی اوزه رین ده ایسه قوشلار اوچاراق زیتون یارپاقی داشیردیلار. دونن آمما دونن ده قالمیشدی واو سونبول کولی ایله دولمو ش چانتاسین گؤتوره رک ، صاباحا گئدیردی . ساری گلینی ایتیرمیشدی و اونون یانیق ساچلاری ایله دولاشماق دایدی . گؤی قورشاقی اونو هوس لن دیردی و کوف گئده رک ، بوتون کول لری ، چانتاسیندان بوشالتدی . سونرا گولدی و اَن یوکسک لردن ، اؤزونو صاف بیر هاوایا آتاراق ، قانادلارینی آچدی . اولدوز لارا چاتماق ایستیردی آمما ، گوندوزایدی و هئچ بیر سایریشان اولدوز گؤزه دَیمیردی .آغاج دا بیر آلما گؤردی و اونو دیشه چکه رک ، درین دن بیر نفس آلدی . کئفلی گودنلر بو اوچوشو گؤره رَک ، دره یه ائنیب گوللری آیاقلارکن ، اونو جوشغون چایین سئل لرین ده ، بیر کؤتو یه ایلیشمیش گؤردولر. آمما نه یازیق کی بودا چوخ چکمه دی و سئل او نو باش آشاغی گؤ تورمک له بیر گولله سسی گولوش لر له قاتیشدی . چای هله بوروغو دؤنمه میشدی کی، سایریشان گونشین ساری تئل لری ، قیزیل قانلا بولاشدی وایل لر بوندان اؤنجه سی کیمی ، ساری گلین ین اوره یی ، بیر داها قان اولدی . بالاجا بالیق آمما ، کسمه یوللاردان گئده رک دنیزده ایدی و واخت ائتدیک ده، اؤتموش دونن لرین ، خاطیره سین یازیردی.
1384
|
